E che vo' di', si dint' a giografia
è presentata cu ‘na macchiulella;
o, si, guardanno da Santa Lucia,
tu a vide piccerella piccerella.
 
Cca nun ce truove ‘a dama cu ‘e sceccuaglie,
che corre a Ischia, l'isola gemella.
Cca ll'oro nun t'acceca, nun t'abbaglia
E a' femmina è cumm' era ‘a Graziella.
 
‘O mare, ch'è de ciente e cchiù culure,
s'astregne attuarne e tutte l'accarezza:
‘stu mare, quanno è calmo o quanno è scure,
s' ‘a guarde sempe cu ‘na tenerezza.
 
E' semplice, gentile, appassionata;
nun tène boria, è senza gelosia:
sirena ca t'affascina ‘ncantata
Procida è ammore, è pace, è poesia.
 
Mimì Ferrara